நாளை ரஜினியின் கோச்சடையான் ட்ரெய்லர் வெளியீடு

எந்திரன் படத்தையடுத்து மூன்று ஆண்டுகளுக்குப்பிறகு ரஜினி நடித்துள்ள படம் கோச்சடையான். இப்படத்தில் அப்பா-மகன் என இரண்டு கெட்டப்புகளில் நடிக்கிறார். 

5 மொழிகளில் தயாராகும் இப்படம் ஹாலிவுட் மற்றும் 3டி மோஷன் கேப்சரிங் தொழில் நுட்பத்தில் தயாராகியுள்ளது. 

இந்தியாவில் இதுவரை எந்தவொரு படமும் இந்த தொழில் நுட்பத்தில் வெளிவராத காரணத்தினால், பெருவாரியான இந்திய ரசிகர்கள் இப்படத்தின் வரவை ஆவலுடன் எதிர்நோக்கியுள்ளனர்.

அதனால் இப்படத்தை இந்தியா மட்டுமின்றி பல வெளிநாடுகளிலும் வெளியிட திட்டமிட்டுள்ள ரஜினி, படத்தின் ட்ரெய்லரை கேன்ஸ் திரைப்பட விழாவில் வெளியிட திட்டமிட்டார். 

ஆனால், ரெடி பண்ணப்பட்ட ட்ரெய்லரில் அவருக்கு திருப்தி ஏற்படாததால், அந்த முயற்சியை கைவிட்டார் ரஜினி. 

இருப்பினும் சர்வதேச அளவிலான ஏதாவது ஒரு விழாவில்தான் கோச்சடையான் ட்ரெய்லரை வெளியிட வேண்டும் என்ற முடிவில் இருந்து வந்தார் அவர்.

இந்த நிலையில், நாளை (ஞாயிற்றுக்கிழமை) கோச்சடையான் படத்தின் ட்ரெய்லரை வெளியிட ரஜினி முடிவு செய்திருப்பதாக செய்திகள் வெளியாகியுள்ளன. 

ஆனால், சாதாரணமாக வெளியிடுகிறாரா அல்லது ஏதாவது விழாக்களில் வெளியிடுகிறாரா? என்பதை சஸ்பென்சாக வைத்துள்ளார்களாம். ஆனால். ரஜினிதரப்பிலிருந்து இதுபற்றிய எந்த அறிவிப்பும் இதுவரை வெளியிடப்படவில்லை.